ЧидайтIа…
ЧидайтIа биж элифар заз,
Чиновникар илифардай.
Къуллугъни заз жедай
куькди,
Кьил кьуна къекъведай
тикдиз!
Ава…
Етимар ава,
Кеспи авачиз,
Далу галачиз,
Жибинар атIуз,
Гьатна ракьара,
Йикъар гьисабиз.

Итимар ава,
Куьк къуллугъариз,
Банкар атIуз,
Мекер адгъуниз,
Пулар гьисабиз.
* * *
Квадарнавайди
Квадарнавайдахъ
Шехьзава.
Жагъанвайда,
Бахт я лугьуз,
Кефзава.
* * *
Къе цIийи хабар
Агакьнава зав:
Дергесарни хъфизва лугьуз
Шаламрин патав!
* * *
РикIелай алудмир садрани
куьне
Пехилвал тирди фитнедин
диде!
* * *
Девиррикай фикирариз,
Гьат тийин чун женгера.
Къуй агатрай ахварар чав,
Чпиз чна теверай!
* * *
Ракьуни, вун къизил я
лагьайла,
Хкадарна кьуьлерна.
Къизилди, вун ракь я
лагьайла,
Кьам чухвана хъуьрерна.
* * *
Ша, ацукьмир терсина,
Гаф тежервал кирсина!
* * *
Нефсиниз гуз къилавар,
Бушдайбуру жилавар,
Эхир кьиляй квадарда
Жегьил чIаван сувабар!
Муьгьуьббатдин
гьайбатар
“Океанар элкъвенайтIа
теменриз,
Жавагьираз гудай хьи за,
гудай хьи!”
( Шихнесир Къафланов )

Океанар элкъвенайтIа
накъвариз,
Назбикедихъ къурдай
хьи за, къурдай хьи!
* * *
Эфселбурунди
Куьмекдай кьан…
Танишбурунди
Гьуьрметдай кьан
* * *
Гъили-гъил чуьхуьда,
Гъили-чин.
Папа “жибин” чуьхуьда,
Итимди гичин
* * *
Са къадакьдал алгъана,
Хьанавай мягькем,
Инсанрин игьтияжар
Ийизвай бегьем,
МукIратIдин гьунар
Хьайила зи элдихъ,
Намусвилер
Алцумдай квелди?!
* * *
Саламар я авайбуруз
гъурбатда,
Лезги чIал хуьз алакъаяр
аватIа.
* * *
Са акьван гзафни хьун
Герек туш яшар,
Виляй ахквадач вун,
Ахкъваздач къаншар.
Кьуьзуь за вил акьурла,
АлтIушда къвалав,
Жузун-качузун,
Гафар, квай къилав:
— ГьикI я ви зигьин,
Къекъуьн и яшда?
Хъсан яни вун?
Тахьуй явашда!..
Бес садни жечни
Вавай жузадай:
“Ваз кIани -такIан?” —
Гаф мецел гъидай!
* * *
ТIимил акваз
Гьар чкада дуллухар,
ЦIуд пешедал
Ярумчух кьаз
Къуллугъар,
ТIимил ганач
Элдиз сада куллухар…
* * *
Чи дердерин уьруьш
дардай,
Хажалатрин кIула пардай,
Беденрин кагьулвал
кIардай,
Дустариз чан-жигер пайдай,
Ислягьвилихъ лув гурай
чи къастари.
И сагълугърай
Ванрай
Къуй чи тостари,
Бахтлубур хьуй чи
Несилар
Картарин!

Кьасум  Фаталиев