100 йис къейдна

Къадим шегьердин агьалийри чпин баркаллу рухваяр рикIел хуьн патал датIана къайгъу чIугвазва. Шегьерда яшамиш хьайи, зегьмет чIугур ва уьлкведин халкьдин майишат вилик тухуник, къудратлувал мягькемаруник, халкьдин дуланажагъ хъсанаруник дирибашвилелди чпин пай кутур инсанрин тIварарихъ куьчеяр, идараяр язава, шегьердин майданрал абуруз памятникар хкажзава.
Гьа ихьтинбурукай сад генерал-лейтенант Гьуьсейн Расулбеговни я. Адан 100 йис тамам хьунихъ галаз алакъалу яз тешкилнавай мярекатда гзаф инсанри иштиракна. Абурун арада Дербент райондин администрациядин кьил Мегьамед Желилов, адан заместитель Фатулла Фетуллаев, райондин Cобранидин председатель Мажмудин Семедов, администрациядин крар идара ийидай управляющий Руслан Касимов, РУО-дин начальник Суфиян Надиров, жегьилрин крарин ва туризмдин рекьяй отделдин начальник Рафиль Гьажиагьмедов авай.
Мярекатдин иштиракчияр генерал-лейтенант Расулбегован бюстни авай шегьердин Женгинин баркаллувилин музейдиз фена. Ина абур генералдин биографиядихъ, ада уьлкве патал авур крарихъ галаз таниш хьана. Гь.Расулбегов рикIел хкуналди М.Желилова лагьана:
— Генерал-лейтенант Расулбегова метлеблу вакъиайрив ацIанвай яргъи ва экуь уьмуьр тухвана. Адахъ тешкилатчивилин, гьакI жуьреба-жуьре рекьерай алакьунар, бажарагъ авай. Ватандиз ва халкьдиз вафалувилелди къуллугъ авур касди инсанрин, вичи къуллугъ авур коллективрин арада еке гьуьрмет къазанмишна.
Ада са вахтундани хсуси итижар уьлкведин итижрилай вине эцигнач. Гьакъисагъвилелди, низамлувилелди, везифаяр намуслувилелди кьилиз акъудуналди ам гьамиша масадбуруз чешне хьана. Гьукуматди генерал-лейтенантдин гьакъисагъ зегьмет, вафалу къуллугъ Ленинан, Ватандин ЧIехи дяведин 2-дережадин, Яру Гъед, Зегьметдин Яру Пайдах орденралди, “Женгинин ла-йихлувилерай”, “Одесса хуьнай”, “Кавказ хуьнай” ва маса медалралди къейдна.
Рахунрилай гуьгъуьниз иштиракчияр Гьуьсейн Расулбегова кIелай ва чирвилер къачур Дербент шегьердин 1-нумрадин школадиз фена. Шегьерэгьлийри мемориальный кьулунин кIаник цуьквер эцигна ва рикIел аламукьдай шикил яна. Юбилейдихъ галаз алакъалу шад мярекат генералдин хайи хуьре — Рукела давамарна.

Хийир Эмиров